ಟ್ರಂಪ್ ಗ್ರೀನ್ಲ್ಯಾಂಡ್ 'ಯು-ಟರ್ನ್': ಅಬ್ಬರಿಸಿದ ಅಮೆರಿಕ ಮಣಿದಿದ್ದು ಯಾಕೆ?

 ರಾಜಕೀಯ ಅಂದ್ರೆ ಹಾಗೆ, ಬೆಳಿಗ್ಗೆ ಇದ್ದ ಹಠ ಸಂಜೆ ಇರೋದಿಲ್ಲ! ಅದರಲ್ಲೂ ಡೊನಾಲ್ಡ್ ಟ್ರಂಪ್ ಅವರ ವಿಷಯಕ್ಕೆ ಬಂದರೆ, ಅವರು ಯಾವಾಗ ಏನು ಮಾಡ್ತಾರೆ ಅಂತ ಊಹಿಸೋದು ಕಷ್ಟ. ಇಡೀ ಜಗತ್ತನ್ನೇ ನಡುಗಿಸಿದ್ದ ಗ್ರೀನ್ಲ್ಯಾಂಡ್ ಖರೀದಿ ವಿಚಾರದಲ್ಲಿ ಈಗ ಅಮೆರಿಕಾ ಅಧ್ಯಕ್ಷರು ಇದ್ದಕ್ಕಿದ್ದಂತೆ ಹಿಂದೆ ಸರಿದಿದ್ದಾರೆ. ಡೆನ್ಮಾರ್ಕ್ ಮತ್ತು ಯುರೋಪಿಯನ್ ಒಕ್ಕೂಟದ ಕೆಂಗಣ್ಣಿಗೆ ಗುರಿಯಾಗಿದ್ದ ಟ್ರಂಪ್, ಈಗ 'ಫ್ರೇಮ್‌ವರ್ಕ್' ಎಂಬ ಹೊಸ ಮಂತ್ರ ಜಪಿಸುತ್ತಾ ಸುಮ್ಮನಾಗಿದ್ದಾರೆ. ಹಾಗಾದ್ರೆ ಈ ಬದಲಾವಣೆಯ ಹಿಂದಿನ ಮರ್ಮವೇನು?

ಗ್ರೀನ್ಲ್ಯಾಂಡ್ ಅಂದ್ರೆ ಬರೀ ಹಿಮದ ಗಡ್ಡೆಯಲ್ಲ ಗೆಳೆಯರೇ. ಈ ದ್ವೀಪ ಆರ್ಕಟಿಕ್ ಭಾಗದಲ್ಲಿನ ಅತ್ಯಂತ ಆಯಕಟ್ಟಿನ ಪ್ರದೇಶ. ಇಲ್ಲಿ 57 ಸಾವಿರ ಜನ ಮಾತ್ರ ವಾಸವಿದ್ದರೂ, ಮಂಜಿನ ಅಡಿಯಲ್ಲಿ ಅಗಾಧವಾದ ನೈಸರ್ಗಿಕ ಸಂಪತ್ತು ಮತ್ತು ಖನಿಜಗಳಿವೆ. ಚೀನಾ ಇಲ್ಲಿ ಗಣಿಗಾರಿಕೆ ಆರಂಭಿಸಿದರೆ ಅಮೆರಿಕದ ಪ್ರಭಾವ ಕುಗ್ಗಬಹುದು ಎಂಬ ಆತಂಕ ಟ್ರಂಪ್ ಅವರಿಗೆ ಇತ್ತು. ಜೊತೆಗೆ ರಷ್ಯಾ ಕೂಡ ಆರ್ಕಟಿಕ್ ಭಾಗದಲ್ಲಿ ತನ್ನ ಮಿಲಿಟರಿ ಶಕ್ತಿ ಹೆಚ್ಚಿಸುತ್ತಿರುವುದು ಅಮೆರಿಕಕ್ಕೆ ನಡುಕ ಹುಟ್ಟಿಸಿತ್ತು.

ಗ್ರೀನ್ಲ್ಯಾಂಡ್ ಪಡೆಯಲು ಟ್ರಂಪ್ ಎಂಟು ಯುರೋಪಿಯನ್ ದೇಶಗಳ ಮೇಲೆ ಭಾರೀ ತೆರಿಗೆ (ಟ್ಯಾರಿಫ್) ವಿಧಿಸುವ ಬೆದರಿಕೆ ಹಾಕಿದ್ದರು. ಆದರೆ ಯುರೋಪಿಯನ್ ಯೂನಿಯನ್ ಈ ಬಾರಿ ಅಮೆರಿಕಾದ ಮುಂದೆ ಮಣಿಯಲಿಲ್ಲ. ಬದಲಾಗಿ, "ನಾವು ಡಾಲರ್ ಮೇಲಿನ ಅವಲಂಬನೆ ಕಡಿಮೆ ಮಾಡ್ತೀವಿ" ಅಂತ ಉರ್ಸುಲಾ ವಂಡರ್ ಲೇಯನ್ ಖಡಕ್ ಆಗಿ ಹೇಳಿದ್ದು ಟ್ರಂಪ್‌ಗೆ ಬಿಸಿ ಮುಟ್ಟಿಸಿತು. ಅಂತಿಮವಾಗಿ ನಾಟೋ ಮುಖ್ಯಸ್ಥರ ಜೊತೆಗಿನ ಭೇಟಿಯ ನಂತರ ಟ್ರಂಪ್ ತಮ್ಮ ನಿರ್ಧಾರದಿಂದ ಹಿಂದೆ ಸರಿದು, ಸದ್ಯಕ್ಕೆ ಟ್ಯಾರಿಫ್ ರದ್ದು ಮಾಡಿದ್ದಾರೆ.

ಈ ಇಡೀ ನಾಟಕದಲ್ಲಿ ಲಾಭ ಮಾಡಿಕೊಂಡಿದ್ದು ನಮ್ಮ ಭಾರತ! ಯುರೋಪ್ ಮತ್ತು ಅಮೆರಿಕಾ ಸಂಘರ್ಷದ ಲಾಭ ಪಡೆದ ಭಾರತ, ಯುರೋಪಿಯನ್ ದೇಶಗಳ ಜೊತೆ ಸುಲಭವಾಗಿ ಟ್ರೇಡ್ ಡೀಲ್ ಮಾಡಿಕೊಳ್ಳುತ್ತಿದೆ. ಅಮೆರಿಕಾದ ಒತ್ತಡಕ್ಕೆ ಮಣಿಯದ ಭಾರತದ ಗಟ್ಟಿ ನಿರ್ಧಾರವನ್ನು ಇಡೀ ಜಗತ್ತು ಮೆಚ್ಚಿಕೊಂಡಿದೆ. ಟ್ರಂಪ್ ಅವರ ಈ 'ಯು-ಟರ್ನ್' ಭಾರತಕ್ಕೆ ಮುಂದಿನ ವ್ಯಾಪಾರ ಮಾತುಕತೆಗಳಲ್ಲಿ ಮೇಲುಗೈ ಸಾಧಿಸಲು ದೊಡ್ಡ ಅಸ್ತ್ರವಾಗಲಿದೆ.